ഓണം അവൾക്ക് സമ്മാനിച്ചത്

ഭയന്ന് ഇറുക്കിയടച്ച കണ്ണുകൾ തുറക്കുമ്പോൾ ആദ്യം കണ്ടത് തളംകെട്ടിക്കിടക്കുന്ന രക്തമാണ്. ഒന്നു മാത്രം നോക്കിയുള്ളൂ… ബോധം മറഞ്ഞു വീണു. വീഴുന്ന അവളെ പിടിക്കാൻ ആ കൈകൾക്ക് ശേഷിയുണ്ടായിരുന്നില്ല.
മിടിക്കാത്ത ഹൃദയം ആ കൈകൾക്ക് ജീവൻ നൽകുന്നതെങ്ങനെ?

ബോധം മറഞ്ഞു വീഴുന്ന തന്റെ മകളെ നോക്കി നിന്ന ആ ആത്മാവിന് ഓടിച്ചെന്ന് ചേർത്ത് പിടിക്കാൻ കഴിയുന്നതെങ്ങനെ?

നിലച്ചു പോയ തന്റെ ശരീരത്തിന് സമീപം നിന്ന് ആർത്തലച്ച ആ ആത്മാവിനെ ആരും അറിഞ്ഞതേയില്ല. പൂക്കളമിടാൻ പൂവ് തേടി അച്ഛനോടൊപ്പം ഇറങ്ങിയ അവൾക്ക്, വിധി ഒരു രക്തപൂക്കളം തന്നെയായിരുന്നു ഒരുക്കിയത്. പിന്നീട് ഒരിക്കലും അവൾ ശബ്ദിച്ചില്ല. പൂക്കളം ഒരുക്കാൻ വാശിപിടിച്ചില്ല. അവളുടെ ഓർമ്മകളിൽ എന്നും ആ ദിനം മാത്രം ബാക്കി നിന്നു.